ACIT – Qendra Shqiptare për Tregtinë Ndërkombëtare, një program i përbashkët i USAID dhe ISB, u krijua në vitin 2002.

Objektivi i saj është përmirësimi i politikave tregtare në Shqipëri, si instrumente të fuqishme që stimulojnë rritjen ekonomike dhe zhvillimin, si dhe rritjen e përfitimeve të shoqërisë dhe qytetarëve nga oportunitetet e krijuara nga liberalizimi dhe integrimi tregtar.

Për të përmbushur këtë mision, ACIT ka zhvilluar një program të bazuar në pesë shtylla kryesore. ACIT funksionon si:

• Qendër studimesh dhe kërkimesh mbi tregtinë ndërkombëtare dhe politikat tregtare;
• Forum i dialogut midis grupeve të interesit, me synim përmirësimin e formulimit të politikave tregtare dhe nxitjen e një debati publik të informuar;
• Qendër burimore, e cila mundëson aksesin e drejtpërdrejtë në informacionin e përpunuar mbi tregtinë ndërkombëtare të Shqipërisë dhe vendeve të tjera;
• Qendër e ndërtimit të kapaciteteve në politikat e tregtisë ndërkombëtare;
• Qendër promovuese e konkurrueshmërisë së ekonomisë dhe produkteve shqiptare.

Qëllimi i punës së ACIT është përmirësimi i performancës së ekonomisë, stimulimi i eksporteve, investimeve, rritja e punësimit dhe mirëqenies në Shqipëri.

Që prej krijimit të tij, ACIT luan një rol të rëndësishëm, veçanërisht si qendër e informacionit tregtar dhe kërkimit profesional në fushën e politikave tregtare. ACIT mbështet proceset e vendimmarrjes dhe marketingut duke i siguruar aktorëve të interesuar informacion të saktë dhe njohuri mbi kushtet, oportunitetet dhe rreziqet e lidhura me çështjet e tregtisë ndërkombëtare, si dhe nëpërmjet analizave të paanshme të prirjeve dhe problemeve lidhur me tregtinë ndërkombëtare shqiptare, implementimin e angazhimeve në kuadrin e OBTsë, MTL-ve me vendet e rajonit dhe MSA-së me BE-në, konkurrueshmërinë e ekonomisë dhe firmave shqiptare, etj.

Duke filluar nga viti 2003, ACIT mbështet nga afër kompanitë që operojnë në industrinë e lëkurë/këpucëve me synim rritjen e konkurueshmërisë së kësaj industrie duke përmirësuar klimën e politikave të zhvillimit në këtë sektor dhe duke forcuar aftësitë manaxheriale, financiare dhe të marketingut të këtyre kompanive.

Faqja kryesore e ACIT në internet - www.acit-al.org vizitohet rregullisht nga përdorues të shumtë brenda dhe jashtë vendit që prej vitit 2002. Ndërkohë, në vitin 2005 dy website të reja janë vënë në dispozicion të publikut www.ftdb.acit-al.info dhe www.albamis.com.